NAKABSAN sa kinabuhi ang usa ka lalaki human gidul-itan pagpusil sa wala maila nga suspek sa Valenzuela Street, Lapasan, dakbayan sa Cagayan de Oro.

Patay si Ruben Estrada Jr., 40, ulitawo ug kasamtangang nanimuyo sa nahisgutang dapit.

Sa nahipos nga impormasiyon, gikabutyag sa board mate nga babaye sa biktima anaa lamang sa gawas sa boarding house atbang sa usa ka tindahan si Estrada dihang adunay nitabok nga wala maila nga lalaki ug gipusil kini.

Giingong giduolan kini og gidul-itan ang mismong ulo ginamit ang wala masuta nga klase sa armas.

Sa pakighinabi sa Sun.Star Superbalita kang Police Chief Inspector Dennis Quindara, hepe sa Police Station Central Luzon (PS3) sa Agora nga wala pa silay nakita karon nga lead o motibo sa pagpatay sa biktima.

Dili usab niini buot nga ikompirma ang kalambigitan sa nigawas nga mga istorya kalabot sa love triangle kay lage wala pa man kini igong ebedensiya o basehan.

“Hindi pa kami makapagbigay pa kung ano talaga ang tunay na motibo nung pagpatay sa kanya, pero yun kinu-consider namin pero mahirap kasi magbigay kami ng impormasiyon na love triangle, mahirap kasi wala pa tayong sapat na ebedensiya o katibayan na magtuturo na ganun nga,” pahayag ni Quindara.

Gidugang pa niini nga wala pa sila’y makita sa pagkakaron nga makatudlo sa motibo sa krimen kay lage ang kaipon niining biktima anaa man sa gawas sa nasud nagtrabaho.

Ang suspetsado nagsul-ob og itom nga T-shirt, maong pants, gamayon ang panglawas, itumon ug gibana-banang aduna’y gitas-on nga 5’4.

Gidala sa Northern Mindanao Medical Center ning dakbayan apan wala na kini makaagwanta ug nakabsan na sa hinulamang kinabuhi mga alas 12 sa tungang gabii.