NIDANGOP sa kapulisan ang usa ka ulitawo human giingnan og pisot ug bayot niadtong nilabay nga adlaw sa Barangay Kauswagan, dakbayan sa Cagayan de Oro.

Ang maong ulitawo nailang si Jonito (bansagon gitago), 21, residente sa maong dapit ug gireklamo ang laing ulitawo nga si Sergio (bansagon gitago), 19, dunay kaipon nga taga Opol, Misamis Oriental.

Giingong gi-harass kini ni Sergio ug gani gisumbag pa ug gipaak ang iyang kumagko. Dili pa igo, gipakaulawan pa kini ug giingnan nga bayot, pisot ug talawan.

Nasayran nga nagkabingkil ang duruha nga niresulta sa maong insidente.

Sa pagsulat niini nga balita, detinado ang suspek alang sa tukmang kaso nga posibleng ipasaka batok kaniya.