WALA'Y puas ang pasalamat sa Leupapo Inc. tungod na usab sa walay puas nga tabang sa Regional Training Center (RTC)-Northern Mindanao ngadto kanila.

Nasayran nga si Police Colonel Edison Revita, regional training director, ang mismo nga nangusog ug nitabang alang niining mga bata nga naghambing og cancer diin natandog kaayo ang balatian labi na nga nakasaksi sa kahimtang kaniadto sa mga bata nga anaa sa Leupapo.

Gani ang bahin niini isip rice allowance ginahatag kini diha sa mga bata ug nakigpartner sa Red cross diha sa pagdonar og dugo ug kini aron nga kung dunay panginahanglanon ang Leupapo dali kining mahatagan ug maprayoridad.

"Kahit sino man siguro maaawa ka talaga, at least kahit man lang sa ganyan, hindi na mamomroblema yung mga parents para sa pagkain nila kasi nga namomroblema pa sila sa mga panggamot," matud ni Revita.

Dako kaayo kini nga tabang alang sa Leupapo labi na ni Reczel Clarabal nga kaniadto magkadiin diin og pangita alang sa ilang pang-adlaw adlaw lakip na usab kung dunay bata diha sa Leupapo nga magkinahanglan og dugo.

"Dili ingon nga gamay. Dako gyud kaayo nga tabang nga gihatag ni Police Colonel Revita nga kay siya gyud mismo mangita og pamaagi nga unsaon niya pagtabang ang Leupapo kumbaga makatinda gyud dinhi sa RTC," matud ni Clarabal.

Giingong anaa sa kapin P2,000 ang kitaon sa mga ginikanan matag adlaw diha sa tindahan sa RTC nga karon hingpit na nga gitawag nga Honesty Store.

Tungod niini, duna nay mga pamasahe nga magamit ang mga ginikanan nga nag-atiman sa ilang mga anak nga naghambing og cancer ug kasamtangang nagpasilong sa Leupapo diha sa Bulua.

"Karon, dili na mi magproblema kung asa mi manguha para mapakaon sa mga bata kay naa namo halin sa matag adlaw," dugang niini.

Healthy usab nga mga pagkaon ang ilang ginabaligya sa RTC sama sa mga prutas, mais, kamote ug uban pa.