LAING team lider na usab sa Communist Party of the Philippines-New People's Army (CPP-NPA) ang boluntaryong mitahan sa kasundalohan didto sa Barangay St. Peter, Malaybalay City, Bukidnon.

Si Jurnaven Saligoy Napungahan alyas Jibber, 23, ang personal nga mitahan sa iyang kaugalingon ngadto kang First Lieutenant Noel Manalang, commanding officer sa Charlie Company, 8th Infantry Battalion (8IB), 4th Infantry Division, PA niadtong Domingo, Pebrero 17.

Si alyas Jibber usa ka team lider sa Sub-Regional Command 2 sa North Central Mindanao Regional Command (NCMRC) ug bitbit niya sa iyang pagtahan ang usa ka carbine rifle nga adunay napulo ka buhing bala ug laing kalibre 45 nga adunay lima ka buhing bala.

Lumad kining taga Barangay Binicalan, San Luis, Agusan Del Sur.

Gibutyag ni Jibber nga naluoy siya sa iyang mga ginikanan nga pulos nasakit karong panahona ug walay niatiman hinungdan nga misurender.

Gibutyag sab niini nga gikapoy sab siya sa pasalig sa ilang grupo apan daw wala makatabang sa iyang pamilya.

“They (NPA) are always promising that we will win the war against the government but we always run when the army arrives and we are experiencing hunger. When I heard about the E-CLIP of the government through the radio program of the 8IB, I decided to surrender,” sulti ni Jibber.

Matud ni Lieutenant Colonel Ronald M. Illana, kinsa battallion commander sa 8IB nga maayo lamang ang walhong grupo sa pasalig apan dili nila mahatag ang panginahanglan sa ilang miyembro.

“He was only a victim and we will accept him to return to his normal lives. Your Philippine Army together with the LGU and other government agencies will process all the benefits to be given to him to include the support/help to his family,” matud ni Illana dungan sa panawagan sa ubang kauban niini nga mobalik na sa sabakan sa gobyerno kay andam sila modawat kanila.