DIREKTIBA sa buhatan sa Department of Interior and Local Government (DILG) nga kinahanglan i-post sa mga barangay kapitan ang listahan sa mga nakadawat ug ayuda pinaagi sa Social Amelioration Program (SAP) nga ubos sa Department of Social Welfare and Development (DSWD) sa ilang tagsa-tagsa ka barangay aron masiguro ang transparensya ug walay mga gipangpaboran.

Pahayag kini ni DILG-Northern Mindanao regional director Arnel Agabe atol sa virtual press briefing sa Northmin Regional Task Force for Covid-19.

"I am encouraging sa atong mga barangay official nga i-post ang mga beneficiary sa Social Amelioration Program labina kadtong gi-validate na ug naa na sa listahan at the same time kadtong atong gi-submit nga additional list nga who were identified," panawagan ni Agabe.

Dugang niini nga klaro kaayo sa kamandoan ni DILG Secretary Eduardo M. Año nga importante kini kaayo nga ma-post aron mahibaloan ug makita ang listahan sa target sa SAP beneficiaries ug ilang mapalambo ang tinud-anay, insakto ug transparent nga pag-manage sa pundo sa SAP.

"This is part of transparency kay ang barangay official maoy accountable kung dili mao iyang gipanglista kay basin dili qualified unya kay doul sa dughan ni Kapitan iyang giapil gilista," matud ni Agabe.

Tabang sab kini sa mga kapitan nga mahibaloan kung kadtong mga anaa sa listahan kwalipikado ba gyud niini nga programa ug kung adunay mga reklamo deretsong maaksyunan.

Dugang ni Agabe nga nakalatid sa kamandoan nga ang mga kapitan nga dili mosunod niini nga gabayan ang adunay mga kasupakan nga atubangon sa balaod.