WALA nay kinabuhi nga napalgan ang usa ka lola niadtong Hunyo 18 mga alas 8:00 sa gabii sa Saint Ignatius Street, Barangay Macasandig, ning siyudad sa Cagayan de Oro.

Si Evangeline Pamisa, 69, balo, lumad sa Barangay Linggangao, Balingasag, Misamis Oriental, ug nag-inusarang nanimuyo sa maong dapit isip caretaker sa panimalay ni Fering Semana.

Sa nahipos nga impormasiyon gikan sa Police Station 9 (PS9) sa Macasandig sa pagpangulo ni Police Captain Teodoro De Oro, walay foul play sa kamatayon ni Pamisa ug gani sarado ang tanang pultahan sa balay.

Gidugang pa nga giingong kanunay kining mag-inom, gani posibleng maoy rason sa kamatayon niini.

"Yes, murag mao sad ang cause sa iyang pag kamatay," matud ni De Oro.

Ang patay nga lawas ang kasamtangang gi-atiman na sa anak ni Pamisa nga si Christopher Daanoy, 43, ulitawo nga nanimuyo sa Upper Tambo, Barangay Macasandig ning siyudad kinsa nagdumili na nga ipasusi sa Scene of the Crime Operatives.