PATAY diha-diha dayon ang usa ka tiguwang human maligsi sa usa ka pribadong sakyanan niadtong Miyerkules sa buntag, Hulyo 18, 2018 sa National Highway Gusa, dakbayan sa Cagayan de Oro.

Patay si Ernesto Boyles, 76, residente sa Capistrano Complex, Gusa samtang ang drayber sa Mitsubishi Strada pick-up naila nga si Fredie Wabina, 47 nga taga Agora, Tagana-an, Surigao del Norte.

Sa nahipos nga impormasiyon gikan sa Police Station 3 (PS3) sa Agora, gikabutyag nga nitabok ang biktima kauban ang apo niini nga 10 anyos dihang nabanggaan.

Basi sa nakakita, nibalik sa iyang agi ang biktima hinungdan aksidente.

Dali pa nga gidala sa Capitol University Medical Center ang biktima apan nakabsan na kini sa kinabuhi.

Ang drayber kasamtangang anaa sa mini-cell sa PS3 sa Agora.