NAKABSAN sa kinabuhi ang usa ka 83 anyos nga lolo human kini nalatayan og ligid dihang naligid sa gisakyang bisikleta mga alas 1:30 sa hapon Martes, Pebrero 25, sa District 6 Road, Barangay Consolacion, dakbayan sa Cagayan de Oro.

Giila ang biktima nga mao si Eleazar Pacamo Abalde, 83, residente sa susamang dapit. Sa imbestigasyon sa traffic investigator gikan sa Police Station 5 sa Macabalan nasuta nga ang insidente gikalambigitan niining bisiklita nga gisakyan sa biktima.

Usa ka dump truck nga gimaneho ni Pedro M. Malabosa, 46, taga Pangantucan, Bukidnon ug usa ka dyip nga gi-parking sa kilid nga gibyaan sa driver nga giilang si Giovanne C. Tamayo.

Paingon sa norte ang direksyon sa biktima nga si Abalde sakay sa iyang bisikleta ug misikit kini sa dalan tungod sa naka-parking nga dyip apan nawad-an kini og balanse hinungdan naligid ang bisiklita niini lakip ang biktima nga timing sab nga maoy pag-agi sa dump truck maoy rason nga nalatayan ang biktima ughinungdan nga dead on the spot.

Dili tiaw ang kadaot sa lawas nga naangkon sa biktima. Ang Oro Rescue Team nga usa sa miresponde sa insidente ang mihatod niini sa Somo funeral homes samtang driver sa dump truck detenado na karon sa pulis istasyon.