WALO ka dinunggaban sa nagkadaiyang parte sa lawas ang naangkon sa manghod human gidunggab sa igsuon niini niaging semana sa lungsod sa Claveria, Misamis Oriental.

Ang biktima giilang si Usmar Yamba, hingkod ang edad. Samtang ang gitumbok nga suspetsado giila nga si Manuel Yamba.

Ang mag-igsuon pulos mga residente sa Sitio Man-ibay, Barangay Aposkahoy, lungsod sa Claveria, Misamis Oriental.

Nasayran nga adunay bikil ang magsuon nga misangpot sa pagdumot.

Human sila nangaon niadtong tungora samtang naghatod si Usmar og plato sa kusina kalit kining gihansakan og kutsilyo sa igsuon hinungdan sa pagkaigo sa dughan niini.

Giutrohan pa sa igsuon sa atubangan og dunggab hinungdan nga nakaangkon og walo ka samad nga maoy hinungdan sa hinanaling kamatayon.

Misibat dayon si Manuel ug mikagiw sa laing barangay, ug sa dihang mibalik sa barangay giaresto na kini sa mga residente tungod sa dili tiaw nga nahimo niini.

Basi sa Claveria Police Station nga usa ka citizen’s arrest ang nahitabo kang Manuel niaging adlaw.

Sa kasamtangan, anaa na kini gikostudya sa kapulisan kinsa gitakdang mag-atubang og kasong murder.