PANGANDAMAN sa 4th Infantry Division (4ID) sa Philippine Army kon mahitabo nga walaon ang martial law sa pipila ka bahin sa Mindanao.

Kini ang reaksyon ni Captain Reggie Go, tigpamaba sa 4ID, dihang gipangayoan og reaksyon sa SunStar Superbalita Cagayan de Oro.

Nahimo kining hisgotanan human nga si Davao City Mayor Sara Duterte nipaabot nga kon mahimo dili na ilakip ang Davao City sa martial law kay malinawon na ang siyudad.

Nangayo kini og tabang ngadto sa House of Representatives nga dili na ilakip ang Davao City. Nagpadala na usab ang mayor og sulat ngadto sa iyang amahan nga si Presidente Rodrigo Duterte niadto pang Agosto nga dili na ilakip ang Davao.

Gumikan niini gituohang moabot ang kamandoan nga walaon ang martial law sa pipila ka bahin sa Mindanao ug dili lang sa Davao apan giingong lakip ang siyudad sa Cagayan de Oro.

Matud ni Go nga ang Davao sakop sa Western Mindanao Command.

Ang Cagayan de Oro sakop sa Eastern Mindanao Command ug wala pay rekomendasyon nga walaon ang martial law dinhi.

Dugang sab ni Go nga bugtong ang presidente lamang sa nasod maoy momando kon ipadayon kini o dili.

"Ang martial law po is malaking tulong in terms of peace and order sa 4ID area at kung mangyayari man yan paghahandaan po yan ng security forces for the adjustment," matud ni Go.