NAGPAHIGAYON og tree planting ang mga inahan kauban ang mga bata nga naghambin og sakit nga leukemia kini baylo sa matag malampusong gidonar nga dugo niadtong bulan sa Hulyo.

Anaa sa 48 ka mga bag sa dugo ang malampusong nadonar ngadto sa mga bata diha sa Leukemia Patients and Parents Organization (Leupapo) hinungdan nga anaa usab sa 48 ka mga kahoy nga lambago ang ilang gitanom diha sa kilid sa Cagayan de Oro river.

“Nagbuhat mi og bloodletting program kung pila ma-donate nga blood mao pud na ka lambago tree ang among itanom dinhi,” matud ni Reczel Clarabal, founder sa Leupapo.

Samtang mapasalamaton usab si Engineer Armen Cuenca, ulo sa City Local Environment and Natural Resources Office (Clenro) niini nga kalihukan tungod kay dako na usab kaayo ni nga tabang.

“Tree planting to siya sa mga parents sa leukemia patients nga ilang gitamnan og usa ka kahoy ang kada dugo nga gi-donate, dunay bloodletting,” matud ni Cuenca.

Nasayran nga gitakdang magpahigayon na usab og laing bloodletting program sunod bulan ug matag malampusong pagdonar sa dugo katumbas niini ang usa ka kahoy nga itanom.

Ang maong kalihukan gipangulohan sa Clenro ug mismong ang environmentalist, negosyante ug blogger nga si Nico Bolzico usab ang nihimamat sa mga bata nga naghambin og sakit nga leukemia diin buot usab niini nga matabangan.

Samtang nipasalig usab si Bolzico nga mobalik sa siyudad alang sa pagdonar og dugo.