ANDAM na ang kapolisan sa Cagayan de Oro City Police Office (Cocpo) sa State of the Nation Address (SONA) ni Presidente Rodrigo Duterte karong Hulyo 23, 2018 adlawng Lunes.

Ipatuman sa kapolisan ang maximum tolerance alang sa mga raliyesta kung ugaling aduna ma’y maghimo og mga kalihokan nga maka-apekto na sa seguridad sa katawhan.

Apan nihangyo ang kapolisan nga unta respetuhon ang katungod sa matag usa ug dili maghimo og mga bayolente nga mga binuhatan.

“At the same time dili pud namo tugutan nga naa mangabuso nga mga kapulisan sa mga raliyista,” pahayag ni Police Superintendent Mardy Hortillosa, tigpamaba sa Cocpo.

Matud ni Hortillosa nga adunay nag-apply sa lokal nga panggamhanan nga magpahigayon og rally diha sa Magsaysay Park sugod alas 8:00 sa buntag hangtod na sa alas 5:00 sa hapon atol sa SONA diin mao kining grupo sa Bagong Alyansa Ng Pagbabago.

“Naa nata security plan ani, kami sa COCPO kauban ang Task Force Oro ug Lokal nga Pangagamhanan amo gyud silang bantayan nga mahimong safe and secured sila sa ila pagrally kay gi-respito namo ang ila katungod nga magpadayag sa ila sentimento sa goberno kaning gitawag nato mga freedom of speech but amo gihangyo nga ila pud respituhon ang katungod sa uban mga mga tao pinaagi sa dili paghimo ug bayolente nga binuhatan,” dugang niini.

Gi-aghat ang katawhan o publiko nga magbinantayon sa kanunay gumikan kay wala’y nasayod sa plano sa mga dautang elemento sa katilingban.

Kung aduna’y mamatikdan nga mga kadudahan ang katawhan pwedi nga itawag gyud dayon sa buhatan sa Cocpo pinaagi sa ilang hotline number 0936-401-7888 aron nga ma-aksiyonan ug mahatagan sa tukmang aksiyon sa atong mga kapolisan.