HUGOT ang pag-monitor karon sa Regulatory Compliance Board (RCB) ngadto sa mga minor de edad labina sa nagkaduol nga kasaulogan sa Valentine's Day, Pebrero 14, sa nagkadaiyang mga motel sa dakbayan sa Cagayan de Oro.

Gibutyag ni Antonio Resma Jr., Inspectorate team leader sa RCB, nga padayon gihapon ang ilang pag-inspeksiyon sa mga hotel ug motel.

"Ongoing gihapon atong monitoring and inspection sa mga inns, motels ug hotels," matud ni Resma.

Naghangyo usab kini sa katawhan nga motabang sa pagbadlong sa mga minor de edad nga makita labi na nga kung mosulod sa mga balay papahulayan o mga inn/motel ug hotel.

"Also, among hangyo sad sa public nga mo tabang og badlong kung man gali naay mga minors ma kita mo sulod sa mga establishments labaw na karon nga Valentines," dugang pa.

Nasayran nga ginadili gyud ang mga minor de edad nga mosulod sa maong mga patigayon sa bisan unsa nga panahon gawas lamang kung kauban niini ang mga ginikanan.

Ang mga patigayon kinahanglan nga dunay logbook alang sa mga minor de edad ug pangayoan og identipikasiyon o ID ang mosulod aron pagpamatuod nga hingkod na ang pangidaron niini.