GIKUMPIRMAR ni Misamis Oriental Governor Bambi Emano nga mopaabot og tabang ang Kapitolyo probinsyal ngadto sa mga apektado sa pag-alburoto sa bulkan sa Taal probinsya sa Batangas.

Gibutyag ni Emano sa SunStar Superbalita nga magpaabot ang Kapitolyo og tabang ug gahulat pa lamang sa gobernador sa dapit kung unsay mga kakulang aron maoy mahatag sa lalawigan.

“Yes magpadala ta og tabang pero gahulat pa mi sa need sa Governor,” matud ni Emano.

Gikasubo niini ug gikabalaka ang kahimtang sa mga residente nga duol sa Bulkang taal nga kasamtangang aktibo sa pagbuga og abog ug posibleng makahatag kadaot sa panglawas sa katawhan.

“Sa Tagaytay, dunay kan-anan, overlooking sa Taal Volcano unta dili ingon ana ka apektado ang ilang turismo,” matud ni Emano kinsa nagtoo nga dako og tabang ang ilang turismo sa panginabuhian sa katawhan ug sa pag-alburoto niini ug pagbuga og abog nga mitabon sa ilang mga puloy-anan, sa mga tourist spot makaapekto kini og dako sa ilang turismo.

Gidayeg sab niini ang kalig-on sa katawhang Pilipino nga bisan diha sa social media gapaabot nga dili makalupig sa kalig-on sa mga Pilipino ang bisan unsa nga matang sa kalamidad.

Panawagan ni Emano nga ipahibalo lang unsa pa ang kulang sa probinsya aron ila kining mapadala sulod sa tulo ngadto upat ka adlaw.