SA REGIONAL level kwalipikado ang lalawigan sa Misamis Oriental sa Seal of Good Local Governance (SGLG) Award alang ning tuig 2019.

Kini usa ka dakong pasidungog nga tinuig ihatag sa ahensya sa Department of Interior and Local Government (DILG).

Nasayran nga sa tibuok Northern Mindanao ang lalawigan lamang sa Misamis Oriental maoy ni-qualify sa maong pasidungog ug kon mopasar, moabot ngadto sa national level ug makab-ot ang ikatulo na usab nga pasidungog.

“Kulbahinam kaayo ba kulbaan kaayo ko wala pay result kay dalhon paman sa national but one thing it’s like a ladder but sa first step garbo na nga sa entiro Region 10 (Northern Mindanao) ang MisOr lang ang probinsya nga nakasulod sa qualifier sa SGLG,” matud ni Misamis Oriental Governor Bambi Emano sa SunStar Superbalita.

Gisulti sab niini nga kung molabang o malampasan ang national dako kaayo og tsansa nga makab-ot ang maong pinakadakong pasidungog sa maayong pangoberno.

“Kung molabang pa gyod ta sa national then hopefully atong makuha dako kaayo nga garbo,” dugang niini ug misulti nga ang maayo nga pagpadagan sa probinsya usa sa basihan sa mga negosyante aron ilang saligan sa investment.

Gawas niini daw sayon lang ang pundo sa proyekto tungod kay daghang moabot nga pundo gikan sa nasyunal.

Ang MisOr nakakuha na og SGLG award niadtong tuig 2016 ug 2017.