ANAA na sa sobra sa napulo ka mga indibidwal ang namultahan na human gisugdan na sa hingpit ang multa sa gipatuman nga "no segregation, no collection" policy sa urban nga nga barangay, gikan sa Barangay 1 hangtod Barangay 40 sa siyudad sa Cagayan de Oro.

Gibutyag ni City Local Environment and Natural Resources (Clenro) head Engr. Armen Cuenca nga hingpit na nga gisugdan niadtong Hulyo 16 ang pagpahamtang og multa sa nakalapas niini nga ordinansa sa siyudad.

"Adtong Friday, kapin sa napulo ka mga indibidwal, mga residente ug establishment ang atong na penalized," matud ni Cuenca.

Gidugang pa niini nga anaa sa mga P500 ngadto sa P2,000 ang multa depende usab sa ebalwasiyon sa ilang nahimong kalapasan.

Giingong una kining gipatuman sa nahisgutang Barangay ug kung hingpit na kining mapatuman nga hapsay sugdan na usab kini sa laing mga barangay.

"Di namo dunganon kay basin, ako dili nako kaya kung akong dunganon, so ang ako i-perfect sa namo ning Barangay 1-40 then sugdan dayon namo ang sub-urban barangay," dugang pa.