NAGPABILIN tak-om si Misamis Oriental Governor Yevgeny Vincente 'Bambi' Emano kon hisgotan ang line up sa ilang partido sa PaDayon Pilipino nga daganan sa umaabot piliay labina nga nagkadoul na ang filing sa certificate of candidacy.

Apan nasayran nga si Davao City Mayor Sara Duterte kinsa maoy chairman sa Hugpong ng Pagbabago nagsige og aghat ni kanhi CdeO Mayor Dongkoy Emano nga ang anak niining si konsehala Atty. Nadya Emano Elipe ang maoy palansaron pagka mayor sa siyudad sa Cagayan de Oro.

“I don’t know, wala ko kabalo Mayor ba o Governor. Wala ko kahibalo kon unsay iyang gipangutana. Dili ko kasiguro kon Mayor ba o Governor,” matud ni Bambi nga nahinabi sa mga sakop sa prensa.

Tungod niini gidudahang si Nadya maoy modagan pagka-gobernador sa Misamis Oriental tungod kay katapusan na niiinng termino sa pagka konsehal sa Cagayan de Oro samtang si Bambi maoy modagan sa pagka mayor sa siyudad sa Cagayan de Oro.

“Ambot gyod lagi. Basin. Dili ko kabalo gyud,” dugang niini.

Dugang sa gobernador nga makita sa Commission on Election kon mi-transfer ba kini sa siyudad sa Cagayan de Oro.

Samtang usa ka tinubdan ang nibutyag nga wala mibalhin sa iyang residency si Bambi ug nagpabilin naa gihapon kini narehistro sa lungsod sa Tagoloan rason nga posibleng tapuson gyod niini iyang katapusang termino pagka gobernador sa lalawigan.