DUHA ka mga negosyante karon ang gipailawom sa imbestigasyon human gisumonan ug gi-ronda sa Task Force on Rice Hoarding (TFRH) human gikareport nga nagtago og mga sinako nga bugas sa ware house sa dakbayan sa Iligan.

Gi-raid sa task force ang warehouse nga gipanag-iya sa mga negosyante nga sila si Sonia Payan ug Johnny Tan.

Dinhi nadiskubre ang sinako nga bugas nga giingong smuggled gikan sa nasod sa Malaysia.

Ila kining gi-repack aron ingnon nga nagikan dinhi sa nasod.

Ang task force gilangkoban sa mga opisyales gikan sa National Bureau of Investigation (NBI) sa pagpangulo ni Abdul Jamal Dimaporo ug ingon man sa National Food Authority (NFA).

Nasuta nga 20,000 ka sako sa bugas ang nakita sa warehouse ni Payan ug 30,000 ka sako sa bugas ang nakita gikan kang Tan.

Una na nga gimando ni Presidente Rodrigo Duterte nga sutaon kung kinsa ang nagsige og tago sa mga bugas sanglit usa kini sa hinungdan sa padayong pagsaka sa presyo sa bugas.

Kasamtangang nagpadayon ang mbestigasyon kalabot niini.