TIKLO ang usa ka driver kinsa nakaligis patay sa usa ka singko-anyos nga bata.

Ang maong driver nag atubang og kasong reckless imprudence resulting to homicide.

Ang suspetsado nasikop sa kaliposan pinaagi sa joint operation sa kapulisan sa Police Station 1 (PS1) ug El Salvador Police Station niadtong Biyernes, Oktubre 19, sa Velez-Yacapin street, dakbayan sa Cagayan de Oro bitbit ang warrant of arrest batok niini.

Ang suspetsado giila nga si Jhonel Jaudian, 22, minyo ug residente sa Opol, Misamis Oriental samtang ang biktima niini usa ka singko-anyos (gitago ang pangalan).

Si Jaudin kinsa nahinabi sa SunStar SuperBalita, mibutyag nga nagkasinabot na kini sila kaniadto nga maoy mogasto sa balayrunon sa pagpa-opera sa bata hinungdan nga nakagawas kini apan walay swerteng nakabsan sa hinulamang kinabuhi ang biktima.

“Gi-filan ko nila og sumbong kay wala pud mi naka-bayad sa among saad sa hospital kay paggawas nako namatay na dayon ang bata, wala naman na-operahan,” pag-angkon ni Jaudian.

Giklaro sab niini nga wala kini magtago-tago ug nanginabuhi sa maong dapit aron adunay pambayad.

“Wala man ko ingon nitakas, ang ako lang nga makatigom-tigom ko og kwarta ba.” dugang niini.

Naligsan niini ang singko-anyos nga batang biktima sa dihang kalit nga nitabok sa dalan ug pagtabok nibalik sa agi ug nahabilin ang bata hinungdan nga napunggitan kini.

Sa pagkakaron, ang suspek kasamtangang anaa sa PS1 ug gitakdang dalhon sa El Salvador City.