WALA maabti og 24 oras nadakpan ang usa ka suspetsado pagpanulis sa usa ka negosyante sa dakbayan sa Gingoog, Misamis Oriental.

Sa report sa Gingoog Police Station nasuta nga usa ka pagpanulis ang nahitabo sa Brgy 21, dakbayan sa Gingoog diin ang biktima mao si Renante P. Noculan, 42, taga lungsod sa Magsaysay, Misamis Oriental.

Giingong nagparking ang bongo nga truck dihang giguba sa tulo ka mga suspetsado ang windshield niini ug gikuha ang kolor blue nga sling bag nga adunay sulod P386,000.

Walay nahimo ang biktima tungod kay armado og kalibre .45 ang mga suspek ug misibat sakay sa kolor pula ug itum nga motorsiklo.

S Police Superintendent Ariel Phillip Pontillas miila sa suspek nga mao si Jeffrey Cañete, 39, lumad nga taga Palawan.

Nasikop si Cañete human mitawag ang biktima nga iyang namatikdan ang presensya niini sa lungsod sa Magsaysay nga mosakay unta og bus paingon sa dakbayan sa Gingoog.

Samtang gipangita pa ang laing duha ka mga kauban niini.

Gani ang mga negosyante sa dakbayan naghatag og P100,000 reward sa makatudlo sa suspetsadong tulisan.