SIKOP pinaagi sa warrant of arrest ang usa ka negosyante sa kasong syndicated estafa niadtong Hunyo 21 mga alas 10:00 sa gabii sa Limketkai Drive, Barangay 35, siyudad sa Cagayan de Oro.

Si Kent Troy Sly Ortega Lagang, 26, ulitawo, taga Matilde-Neri street, Barangay Carmen, giingong kauban sa kontrobersyal nga founder sa investment scheme nga "Freedom Traders Club" o Ploutos coin nga si Mark Steven Freeman, kinsa duna usab warrant of arrest sa kasong large-scale swindling.

Nasikop sa operatiba sa Police Station 5 sa Macabalan ubos sa superbisyon ni Police Captain Jack Llanita, station commander, si Lagang.

Gibutyag ni Police Lieutenant Colonel Mardy Hortillosa, tigpamaba sa Cagayan de Oro Police Office, nga nasapon ang suspek tungod kay duna kini warrant ug walay piyansa nga girekomenda.

Ang maong warrant of arrest dunay criminal case R-CDO-19-01661 ug wala kini piyansa nga gi-isyu diha sa Regional Trial Court 10, Branch 20, siyudad sa Cagayan de Oro, niadtong Hunyo 6.

Nasayran nga padayon pa nga gipangita ang ulo sa nahisgutang investment scheme nga si Freeman.