UBOS sa obserbasyon sa mga doktor sulod sa intensive care unit sa pagsulat ning balita ang hepe sa Cagayan de Oro City Police Office (Cocpo) human naaksidente sa Camp Evangelista, Barangay Patag, dakbayan, niadtong adlaw’ng Miyerkules sa buntag, Mayo 22.

Si city director Police Colonel Nelson Aganon giingong naaksidente paglukso sa motorsiklo atol sa gipahigayon nga pre-jump exercise sa motorcycle class course.

Gibutyag ni Police Lieutenant Colonel Surki Sereñas, tigpamaba sa Police Regional Office-Northern Mindanao, nga naghulat pa sila og clearance gikan sa pamilya ni Aganon alang sa pagpagawas sa medical bulletin niini.

“Gusto lang nato ipahibalo sa katawhan nga si Colonel Aganon naa karon sa Intensive Care Unit, naa natay medical bulletin karon pero kinahanglan pa nato og clearance gikan sa iyang pamilya aron masulti sa katawhan,” matud ni Sereñas.

Dugang ni Sereñas kinahanglan pa og recovery si Aganon karong panahona ug gani bisan mga media gidid-an sa pagpasulod sa iyang nahimutangan sa Polymedic Medical Plaza.

“Maot gayud ang pagkabagsak ni Colonel Aganon sa pag-ambak sa iyang motor ug immediately emergency medical surgery dayon ang gihimo sa iyaha tungod sa severe head trauma,” matud niini.

Aminado sab si Sereñas nga successful ang operation ug gihulatan nalang kong unsay epekto sa nahitabong injury ug kinahanglan og duha ka semana nga pahulay aron maka-relax ang iyang lawas.

Matud ni Sereñas nga kining course training sa motorsiklo adunay pipila gyod nga nadisgrasya ug sa sitwasyon ni Aganon kon hain nahitabo ang insidente kinahanglan moambak sa ramp sa 4 feet ka taas.

Gituohang adunay gibati si Aganon atol sa pagpadagan niini sa motorsiklo apan gitouhang gipadayon lamang niini niadtong tungora apan wala kini gikumpirma ni Sereñas.

Giklaro sab ni Sereñas nga anaa kini nga training sa mga kapulisan tungod kay usa kini ka paagi sa pagpatuman sa balaod ug pagukod sa dautang elemento ug gikinahanglan nga maagian kini nga mga training ug proseso usa makab-ot ang dakong posisyon.

Adlaw’ng Huwebes natapos ang motorcycle training course.