GIHINGUSGAN karon sa duha ka mga babaye nga konsehal nga hingpit na nga mapasa ang anti-discrimination ordinance dinhi sa siyudad sa Cagayan de Oro.

Atol sa sesyon sa konseho, nagpahigayon og special report si Konsehal Joyleen Mercedes Balaba kalabot na sa buot niini nga madusong anti-discrimination ordinance.

Gibutyag ni Balaba nga angayan na nga duna nay ordinansa nga maoy manalipod sa mga katawhan nga nakasinati og mga pagtamay.

"May grupo na nga ipag-push, ipagduso ning anti-discrimination ordinance. Timely ra pud kay nahitabo tong sa Quezon City, naa gyuy need dinhi sa atong dakbayan nga mapasar na gyud kini," matud ni Balaba.

Samtang nibutyag usab si Konsehal Edna Dahino, tsirman sa komitiba sa women and family relations, nga anaa na kini sa iyang komitiba alang sa pagbansaybansay.

"We have to fast-track this ordinance nga gikinahanglan gyud sa atong mga igsoon nga naay mga preferences," matud ni Dahino.

Gidugang pa niini nga gipaningkamotan nga hingpit na kining mahuman aron nga mapahimuslan na.

"We really pray nga di pa maabot ang Sityembre mahuman na ni siya para magamit na sa dugay na kaayo nga gipangandoy sa atong mga kaigsoonan sa LGBT community," dugang pa.

Gipanghingusgan ni Dahino ang Sexual Orientation and Gender Identity and Expression (Sogie) bill nga anaa na sa iyang komitiba.

Andam usab ang duha ka mga konsehal nga babaye nga usahon ang mga ideya ug uban pa aron nga maplantsa kini pag-ayo nga ordinansa ug mapahimuslan na sa katawhan ilabi na sa mga sagad nga nakasinati og deskriminasyon.