NAGPAGAWAS og pahayag ang giingong orihinal nga nagpadangat sa 8888 aron ireklamo si Cagayan de Oro Mayor Oscar Moreno.

Ang 8888 usa ka hotline number ni Presidente Rodrigo Duterte din mahimong ireklamo ang mga pulitiko, trabahante sa gobyerno.

Nahimo kining kontrobersyal human niadtong adlawng Sabado atol sa daily press conference ni Cagayan de Oro Mayor Oscar Moreno, iyang gisulti nga ang nag-viral nga tawag sa 8888 drama lamang sa trabahante sa Provincial Capitol ug ginganlan niining si Leona Cabagnot nga taga Jasaan, Misamis Oriental. Kini hugot sab nga gihimakak ni Cabagnot dihang nahinabi sa SunStar Superbalita.

Kagahapon, nipatim-aw pinaagi sa pagpabati sa iyang tingog ang tinoud nga caller nga si Bernadine Castillo.

Gibutyag niini nga anaa siya sa Cavite apan iyang pamilya anaa karon sa siyudad sa Cagayan de Oro.

Pasabot niini nga isip usa ka inahan gikabalaka niya ang kaluwasan sa iyang pamilya human nahibaloan nga adunay mga nagpositibo sa Covid-19.

Maoy rason nganong iyang gireklamo si Mayor Moreno gumikan sa kakulang sa lakang niini.

Giklaro sab niini nga ang voice record nga iyang kopya iyang gi-send sa iyang circle of friends nga group chat aron ipamatuod nga nakatawag siya sa 8888 apan wala niya gidahom nga adunay usa ka higala nga nag-forward niini, hinungdan napasa-pasa ug nag-viral.

Buot sab niini nga itago iyang identity apan naluoy siya ni Cabagnot nga napasinglan ug naangin ang pangalan hinungdan iyang giklaro sa mayor nga wala kini lakip.

Iya sab gipaabot nga isip usa ka Cagayanon nga nagpakabana sa kaluwasan sa katawhan maoy rason nga iyang gitawag sa 8888 aron si Moreno aduna pay mas hugot nga mabuhat.

"Nagtawag ko sa 8888 mayor, nga walay halong pulitika, walay nagsugo ug simple lang nga reklamo so that you can do better," matud ni Bernadine.

Si Cabagnot hugot ang baruganan nga pasakaan og kaso si Moreno sa pagpakaulaw kaniya sa kahanginan ug kadaghanan.

Ang siyudad wala pay reaksyon kalabot niini.