GITUNOL na sa kadagkoan sa National Irrigation Administration (NIA)-Northern Mindanao ang mga nahuman na nga mga proyekto alang sa mga mag-uuma. Nagpahigayon og mass turnover niadtong Septiyembre 20 sa NHotel, Barangay Kauswagan, dakbayan sa Cagayan de Oro. Gibutyag ni General Ricardo Visaya, administrator sa NIA-Northern Mindanao, nga human niining mga proyekto mas palapdan pa ang sunod nga mga proyekto aron nga dili na masinatian pa ang mga problema panahon sa El Niño. “Alam natin na yung effect kasi ng El Niño every other year so for 2020 we will address that, so ‘yung experience natin sa 2019 El Niño will not be experienced that in 2021,” matud ni Visaya. Ang mga proyekto anaa sa P152,265 milyones ang kantidad diin 15 kini ka mga proyekto nga ang makabenipisyo nga mga mag-uuma anaa sa 1,906. Kini nga proyekto dunay 2,618 ektarya sa tulo ka mga probinsiya sama sa Misamis Occidental, Misamis Oriental, ug Bukidnon diin lima niini ang bag-ong gihimo nga mga irigasiyon ug napulo usab niini ang mga rehabilitasiyon sa mga daan nga mga irigasiyon nga proyekto. Samtang sa nakumpletong proyekto anaa sa pito ang alang sa Misamis Oriental, lima sa Misamis Occidental, ug tulo sa probinsya sa Bukidnon. Pinakadaghan usab nga mga mag-uuma nga nakabenepisyo niini mao ang sa Misamis Occidental diin anaa sa 1,288 diin gigahinan og pundo nga anaa sa P39 milyones nga mao usab ang pinakadakong area nga mokabat sa 1,114 ektarya, ug ang pinakadakong pundo nga gigahinan mao ang Misamis Oriental nga anaa sa P83 milyones diin anaa sa 444 ka mga mag-uuma ang nakabenepisyo.