SAPON ang usa ka inahan nga misuksok og P30 mil sa pribadong parte sa iyang lawas kinsa mobisita unta sa iyang napriso nga anak sa Cagayan de Oro City Jail sa Lumbia, dakbayan sa Cagayan de Oro niadtong Abril 11.

Ang maong inahan (gitago ang pangalan) kinsa dunay napriso nga anak nga naga-atubang og kaso sa ilegal nga druga nakapkapan ni Jail Officer (JO) 1 Aileen Ipanag, guwardiya sa male dormitory.

Sa pakighinabi kang JO3 Orlan Montalban, information and community relations service officer sa City Jail, gibutyag niini nga misulay sa pagpalusot ang inahan sa maong kantidad apan tungod sa kahugot sa seguridad sa prisohan wala kini milampos.

Namatikdan ni Ipanag nga labihan ka bugdo ang pribadong parte sa lawas sa inahan hinungdan nga nagduda kini ug gihimo ang pagsusi ug nakuha ang maong kantidad.

Rason sa maong inahan nga ang kantidad ibayad sa utang sa iyang anak.

“She attempted to sneak in the money to be used allegedly to pay off the debts of his son who is a PDL or person deprived of liberty,” matud ni Montalban.

Giklaro sa tinugyanan sa Bureau of Jail Management Penology (BJMP) nga P3,000 lamang ang labing dako nga kantidad ang gitugotan nga mahimong huptan sa usa ka priso. Kini aron malikayan ang paggamit niini gikan sa dautang binuhatan sama sa pagpalit og sigarilyo, pagkontrol sa ubang bilanggo ug bisan sa pagpalit og ilegal nga druga.

Gibalik ra usab sa tinugyanan sa BJMP ang maong kantidad ug kasamtangang gidid-an ang inahan sa pagbisita sa city jail ilabi na sa iyang anak nga anaa sa male dormitory.