MAGSUGOD na og tukod sa inprastruktura human anaa na sa 95 porsento pag clear sa unexploded ordinances (UXOs) ug improvise explosive devices (IEDs) sa labing apektadong lugar sa Marawi City.

Kini gipahibalo atol sa paghidangat sa dakbayan sa Cagayan de Oro sa Task Force Bangon Marawi (TFBM) ug gipahibalo kini atol sa press briefing uban sa Housing and Urban Coordinating Council (HUCC) niadtong Huwebes, Nobiyembre 28, 2019.

Gibutyag ni Secretary Eduardo del Rosario, chairperson sa TFBM ug HUCC, nga laumang matukod na ang mga inprastruktura sa bulan sa Disyembre human hapit na matapos ang clearing operation.

Iyang gipasabot nga dili ingon ana kapaspas ang katukoran niini tungod kay kinahanglan pa nga sutaon nga wala’y mga nahibiling mga eksplosibo sa lugar.

Gipasabot sab niini nga ang gobyerno nigahin og P3.5 bilyones gikan sa 2020 nga budget alang sa prayoridad nga katukoran sa inprastruktura sama sa 24 ka mga barangay hall lakip health center, hospital nga adunay 50 ka higdaan, merkado sa Grand Padian, 200 ka classroom, police station lakip fire station.

Ang katukoran sa Sports Center sa Marawi ang gilaumang nga subhan karong bulan sa Disyembre.

Ubay-ubay na karon ang mga balay nga natukod samtang daghan na sa mga residente ang nagkuha og building permit aron sab sila makasugod sa pagbalik og tukod sa ilang nadaot nga mga balay.

Duha na ka tuig ang nilabay dihang gisulod sa terorista ang siyudad sa Marawi kon asa dili tiaw ang kahadlok ug kadaot nga hatod sa giyera.

Gilauman sa task force nga sa hinay-hinay mabalik ang tanan ug makarecover ang siyudad sama sa naandan.

Ang mga katukoran sa inprastruktura molangkob gikan sa Disyembre ngadto Marso sa tuig 2020.