DILI na angayang maghulat pa sa Executive order gikan sa Mayor human nga nagpagawas ang City Administrator sa siyudad og pahibalo sa publiko ilabi na sa mga sumasakay, drayber ug mga operator sa motorela alang sa pletehan sa motorela ning siyudad sa Cagayan de Oro.

Matud ni Kagawad Teodolfo “Bong” Lao, chair sa committee on public utilities sa konseho nga dili na pareha kaniadto nga maghulat pa og executive order gikan sa Mayor apan karon human sa gipagawas sa City administrator Teodoro Sabugaa nga pahibalo diretso na nga mo-apekto base na sa usab sa fare matrix.

“Mao na gyud to naay corresponding price sa gasoline unya dayon abay dayon ato ang fare,” tipik sa pahayag ni Lao.

Gidugang pa niini nga e-monitor usab gihapon kung nagtaas ba gayud ang presyo sa gasolina diin mao ang tumong nga maghulat pa kaniadto og mando gikan sa mayor aron sutaon una ang presyo kung nitaas o niubos.

“Oo di na actually kinahanglan man gyud na og EO pero nagsulti naman atong City Administrator nga di na at least ilang e monitor pud,“ dugang niini.

Nasayran nga nagpagawas og pahibalo si Sabugaa sa publiko ilabi na sa mga sumasakay, drayber ug operator nga ang pletehan sa motorela nag-agad sa presyo sa special ug premium nga gasolina.

“Ang mga drayber ug operator sa motorela public utility service dili na kinahanglan magpetisyon alang sa pag-usbaw o pagkunhod sa pletehan, buot ipasabot automatic ang pagsaka o pagkanaug sa pletehan kay mag-agad man kini sa paglihom sa presyo sa gasolina matag litro,” tipik sa maong pahibalo.

Nasayran nga adunay multa nga P500 sa mag-overcharge o sobrang pagpaningil sa pletehan.