GIKLARO sa buhatan sa Philippine Atmospheric, Geophysical and Astronomical Services Administration (Pagasa) Northern Mindanao nga taliwala paman sa sunod-sunod nga nasinating pag-ulan wala pay deklarasyon nga “rainy season” karon panahona ang buhatan.

Gibutyag ni Luz Mercado, ang weather broadcaster gikan sa Pagasa-Northern Mindanao nga ang nahitabong pagbundak sa kusog nga ulan gumikan lamang sa inter tropical convergence zone (ICTZ).

Gipasabot niini nga ang hangin nga gatagbo gikan sa aminahang sidlakan ug habagatang direksyon maoy nakapaekto nga madevelop ang dag-om nga gitawag og cumulonimbus clouds nga mao lamang nga panganod nga makahatag og kusog nga pag-ulan.

Wala sab namonitor nga bagyo ug maayo ang kadagatan gawas lamang magbalod kon makasinati ug pagdalugdog.

Hinoun giingong masinatian na gyod ang pag-ulan-ulan apan dili pa gihapon matawag nga rainy season tungod kay wala pa mipasa sa kriterya sa Pagasa.

“Wala pay declaration sa on set sa rainy season kay wala pa maabot ang criteria nga sa ginatan-aw ug ma-meet nga nagsugod na diin ang hangin karon habagat pa ang kasadpang direksyon, isa na nga criteria ug ikaduha dapat ang western portion sa atong nasod makasinati ug sunod-sunod nga five consecutive days nga pag-ulan nga moabot ang tubig og 5.0 millimeters kada adlaw, ug kung moabot og 25 millimeters sa seven consecutive days dinha na modeklarar og on set ang rainy season,” pagpasabot ni Mercado.

Gipanawagan lang niini ang katawhan nga magdala og payong labina makasinati na og matag karon ug unya nga pag-ulan gumikan sa sistema sa panahon nga mao kining ICTZ.