USA ka “public shaming” ang giungong pagbulgar sa pangalan sa mga opisyal sa barangay nga nalambigit sa ginadiling druga.

Kini ang gibutyag ni Jeanne Ivy Abrina, ang regional director sa Commission on Human Rights (CHR) Northern Mindanao.

Matud niini nga usa kini ka pagpanglapas sa katungod tungod kay anaa na sila sa listahan apan wala sila nasayod nga lakip diay sila sa lista.

Wala nakasubay sa due process tungod kay ang sakto nga proseso niini kinahanglan nga kung dunay mga igong ebidensya ug validated nga inpormasyon giandam na sila daan og kaso.

“Ma-violate ilang right to fair trial. Mag suffer pod ilang pamilya kon mapamatud-an diay nga wala gyod sila nahilambigit sa ginadili nga druga,” pahayag ni Abrina.

Unta irekognisar ang katungod sa usa ka tawo labina usa kini ka pagpakaulaw ug kon mahitabo na kini dili na kini mahibalik pa.

Kon mogawas man ang mga pangalan niini karong adlawa miabiso ang CHR niadtong mga naa sa listahan apan walay kamatouran ang akusasyon nga ground kini aron sila mopasaka og libel.