GILAUMAN ang pagdoble o pagsaka sa ihap sa mga sakyanan nga mahidangat sa siyudad sa Cagayan de Oro ug ang pagkabukog sa trapiko ning kasaulogan sa Pasko.

Nagpahimangno ang Roads and Traffic Administration (RTA) ngadto sa mga motorista nga magbalon og pasensiya ug magsinabtanay tungod kay dili malikayan ang susama niini nga sitwasiyon.

Gibutyag ni Engr. Nonito Oclarit, Assistant Department Head sa RTA, nga gilaoman na ang pagdaghan sa mga sakyanan

"Sa December gyud expected gyud na siya. Dili gyud nato na ika-deny nga mo-increase ang number of vehicle dinhi sa atong siyudad, kay kabalo naman ta nga ang atong siyudad sa Cagayan de Oro naa dinhi ang mga dagko nga mall," matud ni Oclarit.

Gidugang pa nga daghan usab ang mga tindahan nga bisitahon sa mga silingang mga dapit nga magdala usab sa ilang mga tagsa-tagsa ka mga sakyanan.

Nagpahimangno kini sa katawhan nga kung mahimo, sutaon una ang kondisyon sa sakyanan aron nga dili kini makabalda sa dagan sa trapiko ilabi na kung simbako magub-an sa tunga sa dalan.

Giingong kung mahimo, molikay sa mga dapit diin sagad dunay daghang mga motorista nga gapangagi pinaagi sa advisory nga ipagawas sa RTA ug sutaon pinaagi sa usa ka mobile app kung duna man kung asa dali nga makalusot, ug labaw na usab ang disiplina sa kaugalingon.

Dugang pa nga hangyo nga kung dili importante ang lakaw, mas mahimong magpundo nalang aron di na makadugang pa sa pagkabukog sa dagan sa trapiko.

"Kung dili sad kaayo importante ang lakaw, dili nalang sad ta ingon nga magsuot-suot sa mga kadalanan. Magdugang-dugang ta sa ka traffic, pero di man nato mapugngan kay pasko gud. Karon, ato lang ani sinabtanay nalang," dugang pa.

Gitakdang magpagawas usab ang ugyanan sa RTA sa ilang traffic scheme alang sa Pasko, ilabi na diha sa merkado sa Cogon nga diin dagsaan sa daghang katawhan.