GILUGWAYAN og usa ka adlaw Sabado, Abril 21, ang pag-file sa certificate of candidacy (COC) human niduso og resolusiyon ang National Youth Commission (NYC).

Hangtud adlaw’ng Biyernes lamang unta ang pagduso sa COC apan gilugwayan kini sa adlaw’ng Sabado.

Sa pakighinabi sa SunStar SuperBalita kang Atty. Ramil Acul, City Comelec officer, nga ang rason sa paglugway gumikan sa kakulangon sa ihap sa naka-file nga mga Sangguniang Kabataan (SK) nga posisyon.

“Kani nga resolution mga ala 6:00 kapin, nakadawat kami og advisory resolution number 10310, lugway siya karong adlawa ang ubos nga hinungdan niini tungod kay ang National Youth Commission nag-express sila og concern nga gamay ra ang Sangguniang Kabataan registrant, nag-file sa ilang COC insufficient kuno ang number nga mo fill-up sa 338,584 ka position nga available sa SK,” ang pahayag ni Acul.

Gidugang pa usab niini nga wala na kini lugway ug taman na lamang kini mga alas 5 sa hapon adlaw nga Sabado, Abril 21.

“Karon rang adlawa (Abril 21, 2018) gyud taman alas 5:00 unya gibutang diri non-extendible,” ang dugang ni Acul.

Samtang nagpasalamat usab ang usa ka Kagawad kinsa buot nga magduso sa iyang kandidatura isip Kagawad sa Barangay 13 sa gihimong lugway tungod na usab kay nakaapas pa kini human naglain ang paminaw sa lawas niadtong Biyernes.

Nasayran nga mokabat na sa 2,914 ang nakaduso sa kandidatora niadtong Biyernes karong umaabot nga eleksiyon.