PADAYONG gi-imbestigahan sa kapulisan ang natigayong pagpang-vandal sa simbahan sa Iglesia Filipina Independiente (IFI) sa Pabayo street ning siyudad sa Cagayan de Oro.

Nakasulat sa pader sa simbahan ang, "IFI church tagoan sa mga NPA. Mga Pari sa IFI terorismo ang gtiudlo-IPCDO."

Gibutyag sa hepe sa Police Station 1 (PS1) sa Divisoria nga padayon ang ilang imbestigasiyon sa maong panghitabo aron nga maila ang naghimo niini ug gani ila usab nga gipatuman ang pagsusi matag karon ug unya sa maong dapit.

"Among gina-agian ug gipalawman ang investigation," matud ni P/Sr. Insp. Rogie Ortencio, hepe sa PS1.

Gidugang pa usab niini nga ila na usab nga gisusi ang mga Closed-circuit Television (CCTV) camera apan wala usab nakuhaan ang maong isidente.

Nagpasalig usab ang kapulisan nga wala kini sila'y gipili nga simbahan nga bantayan ug nagpasalamat usab kay duna ma'y kaugalingong security ang mga simbahan.

"Usa na siya sa mga direktiba sa atong poilice station nato mag-cooridinate sila sa tanang mga simbahan kay dili lang man katoliko ang atong gibantayan diri kun dili ang tanang mga simbahan,any way na aman pud counterpart ang mga simbahan na man sila'y security pud," matud ni P/Supt. Mardy Hortillosa, tigpamaba sa Cocpo.

Nasayran nga una na nga nagpadayag ang tinugyanan sa IFI og kadismaya gumikan kay hinay ang kalamboan sa maong insidente.