GITUGYAN ni Mayor Oscar Moreno ang pagpaili og bag-ong Police City Director sa Cagayan de Oro City Police Office (Cocpo) ngadto sa Police Regional Office 10 (PRO-10).

Alang kang Moreno mas maayo nga ang PRO 10 Director ang mopuli tungod kay kini ang mas nakaila sa mga kwalipikado sa maong posisyon, walay bikil ug maayong motrabaho.

Nabakante na karong ang City Director human nakabsan sa kinabuhi si PCol Nelson Aganon niadtong Hunyo 4.

“Sa ako importante kay choice siya sa Regional Director, like I said dili importante ang ako ang important ang preference sa Regional Director kana sila wala man koy mga close, ang ako is more on the professional side basta maayo mo trabaho, basta walay bikil okay lang sa ako regardless of the name, regardless of taga asa siya,” matud ni Moreno.

“Siyempre the Regional Director is in a much better position to assist kay iya gud ng trabaho, kahibalo gud siya maayo ni nga police kay nakaila na niya, lisod biya kung ang imong chief of police karon pa naila sa Regional Director, lisod,” dugang ni Moreno.

Nasayran nga duna nay nibisita sa buhatan sa mayor nga gituohang interesado sa maong posisyon.

Gituohan nga daghan ang nag-apas sa maong posisyon tungod kay maayo man ang lakaw sa komunidad sa siyudad.

Kahinumdoman nga niadtong Hunyo 6 gipahigayon ang Luksa ng Parangal human gibalhin gikan sa Cosmopolitan Funeral Parlor ngadto na sa Cocpo headquarters ang patay nga lawas ni Aganon diin nagtunol si Moreno og plaque of recognition isip pasalamat ug paghatag og dungog lakip na usab ang kantidad nga anaa sa P400 mil nga gidawat usab mismo ni Reena Aganon kinsa asawa sa namatay nga kanhi opisyal.