SUPAK ang kadagkoan sa National Confederation of Transport Union (NCTU) sa dili pagpasakay sa likod nga bahin sa mga dagkong sakyanan.

Gibutyag ni regional coordinator Joel Gabatan sa NCTU nga dili sila uyon niining kamandoan tungod kay makaluluoy ang mga tawo nga walay ikaplete.

Gibutyag ni Gabatan nga dugay siyang nagmaneho og mga dagkong sakyanan kaniadto hinungdan nga nakasabot usab kini sa mga pasahero.

“Taliwala nga kami naa mi memorandum gikan sa kompanya nga dili magpasakay kay delekado lage pud tungod sa among kalooy sa pasahero nga makayawat intawn kay way pamasahe mao na among ipasakay. Ikaduha, ang among gikahadlokan sa lugar nga among gabiyahean kung di mi mopasakay mahimo mipanglansangan o pangbatuon,” matud ni Gabatan.

Nasayran nga gidili kini tungod na usab sa kadelekado apan lage tungod sa kalooy ilang gisugal ang ilang mga trabaho tungod kay kung masapon posibleng masuspende.

“Pero kani karon gipatuman naman nila makalolooy ang mga walay igong gahom nga ikapamasahe,” matud niini.

Gani gibutyag pa niini nga mas daghan pa gani ang mga naaksidente nga mga pasaheroan nga sakyanan kumpara sa mga dagkong sakyanan nga kargado og mga tawo diha sa likod nga bahin.

Sugyot niini nga kung dunay mga daghang pasahero nga mosakay sa likod hinayan lang sa pagpadagan ug mas maayong dunay speed limit aron malikayan ang mga disgrasya.