MAAYO nga balita alang sa Simbahang Katoliko ang pagwagtang sa martial law sa Mindanao nga tapuson na karong Disyembre 31, tuig 2019.

Kini human gibutyag ni Presidente Rodrigo Duterte nga wala na kini plano nga ipadayon pa ang martial law sa Mindanao tungod kay nakitang wala na kini gikinahanglan.

Alang ni Archbishop Antonio Ledesma sa St. Augustine Cathedral nga kini makapabalik sa peace talk ilabi na sa seguridad sa mga nagsunod niining pagsinultiay sa kalinaw.

“Maayo man na nga balita kay kana makapabalik gyud sa igo nga peace talks nga wala’y parang kulang sa seguridad sa katawhan mga gasunod sa peace talks,” matud ni Ledesma.

Gidugang pa nga sa maong panahon sagad nga gakahitabo ang red-tagging sa mga katawhan nga nag adbokasiya og kalinaw.

“Ug kani man ang ginalikayan man nato dinhi ang red-tagging. Kay kana mura’g ang mga peace advocates karon ang ginatawag mga ginahatagan og red tags, dili man na posible kay sila gani naningkamot man nga makab-ot gyud ang tunhay nga kalinaw,” dugang ni Ledesma.

Kahinumdoman nga nisuporta usab ang mga kadagkoan ug opisyal sa dakbayan sa Cagayan de Oro ug Misamis Oriental niining maong pahayag sa administrasyon.

Samtang suportado usab ang kapulisan niini, apan niangkon nga dako og tabang ang martial law alang kanila diha sa pagpatuman sa kalinaw ug kahusay sa usa ka dapit labi na sa pag-ubos sa ihap sa krimen.

Nagpasalig usab ang mga otoridad nga buhaton ang tanan aron lang nga mamahimong luwas ang katawhan, bisan paman nga dunay martial law ug wala tungod kay bisan sa unsang panahon andam kini nga magpahatag og seguridad sa katawhan.