DUHA ka angulo ang gitutokan karon sa kapulisan sa Medina Police Station kalabot sa ngilngig nga kamatayon sa magtiayon human gipusil ug gipangtigbas sa Barangay San Roque, lungsod sa Medina, Misamis Oriental.

Si Police Senior Inspector Arnold Sala, hepe sa Medina Municipal Police Station, nibutyag sa SunStar SuperBalita nga duha ka dagkong motibo ang ilang gisuta sa kamatayon nilang Orlando Pabular, 62 ug asawa nga si Anita, 46.

Matud ni Sala nga usa sa ilang gilantaw kining pagpanimalos tungod kay sa tuig 2009, si Orlando adunay nakabangi tungod sa boundary sa yuta sa Barangay Eureka, dakbayan sa Gingoog.

Hapit kini gipusil sa iyang gikaaway apan nabaslan ni Orlando ug pagpanigbas hinungdan naputlan kini og tulo ka tudlo.

Atol sa kamatayon ni Orlando niadtong Dominggo sa kadlawon, namatikdan sa mga pulis ang mga tudlo niini nga lakip sa gitigbas ug naputol.

"Usa sa among nakita sa among imbestigasyon kay naputlan gihapon siya og tudlo ug sama sa gituyo gayud og putol," matud ni Sala.

Dugang niini nga wala sila nihunong og imbestigar niini ug padayon sila sa pagsuroy sa mga lugar taliwala layo kaayo aron masuta ang lawom nga rason sa ngilngig nga kamatayon sa magtiayon.

Nasuta nga sa miaging mga tuig, ang anak sa magtiayon gitumbok nga nagpatay sa usa ka trabahante sa kan-anan sa lungsod sa Talisayan.

Tungod sa brutal nga kamatayon ug sa pag-angkon og 19 ka mga samad dinunggaban sa lawas, adunay bahad nga sa dili madugay, manimalos.

"Nadakpan na hinuon ilang anak ug giserbisyohan na hinuon ang salaod karon apan dili gihapon namo wad-on ang posibilidad kay brutal gihapon ang kamatayon atong trabahante nga napatay sa ilang anak," matud pa ni Sala.

Dugang niini nga adunay giingong upat ka lalaki ang namatikdan atol sa insidente.

Nasuta sab nga aduna basyo sa bala sa 45 kalibre ug 9mm nga pistola nga nakuha sa crimescene.

Sa pagkakaron, padayon pa ang imbestigasyon sa kapulisan aron gayud pagtumbok sa mga suspetsado.

Kahinumduman nga gipatay ang magtiayon samtang natog niadtong tungora ug buntag na nadiskubre nga patay kini sa pagpamusil ug pagpanigbas.