LABING unang Philippine Industrial Summit sa Mindanao nga mahitabo dinhi sa Cagayan de Oro ug Misamis Oriental andam na karong umaabot Nobiyembre 25 ngadto Nobiyembre 27 ning tuig.

Si abogado Franklin Quijano ang administrator ug chief executive officer sa Phividec Industrial Authority (Phividec-IA) nibutyag nga kini nga kalihokan iyang gilauman nga mahimong atraksyon niadtong mga industrialists o mga indibidwal nga adunay pangandoy nga magdumala ug mosuway sa natad sa industriya.

Gilauman sab niini nga daghang pang mga investors ang mobubo sa ilang puhunan og motukod og mga kompanya ingon man mga plantadinhi sa lalawigan labina gyod sa Phividec Industrial site nga nahimutang diha sa lungsod sa Tagoloan ug Villanueva Misamis Oriental.

Molangkob og tulo ka adlaw ang industrial summit nga laumang tambongan sa mga dagkong personalidad ug mga nanag-iya sa mga korporasyon. Gani imbitado sa kalihokan si Presidente Rodrigo Duterte.

Highlights sa kalihokan mao ang paghatag og suhestiyon o mga opinyon ug mga abiso gikan sa mga dagkong personalidad sa industriya kung unsaon mas mapadali ang paspas nga kalamboan sa ekonomiya sa nasod sa Pilipinas.