NAKALINGKAWAS ang kapitan sa kamatayon human ang pistola nga dala sa mga mamumuno wala dayon nakapabuto sa dihang gitiunan kini sa pistula.

Daw sama sa usa ka bida sa pelikula ang kapitan nga si Jhon Loue Naiz human kini nakalingkawas sa pagpang-ambush niadtong Hulyo 19 sa Barangay Mailag, dakbayan sa Valencia, Bukidnon.

Kini human wala mibuto ang pusil sa tulo ka mamumuno nga nag-atang kaniya niadtong higayon nga naglibot-libot sa iyang barangay.

Matud ni Police Superintendent Richie Yandog, office-in-charge sa Valencia City Police Office, nga nakamatikod na ang kapitan nga nagsunod niya ang tulo ka wala pa mailhing lalaki sakay sa motorsiklo.

Giingong gipadaplin sa kapitan ang iyang gisakyan nga multicab apan sa paghunong palang niya, gisuwayan na siya pagpusil sa usa ka suspetsado apan wala mibuto ang iyang pistula.

Misuway og pusil ang ikaduha nga lalaki apan wala usab mibuto ang iyang pistula hinungdan nga nakagawas ang kapitan ug mitago sa usa ka balay.

Nakasulod na sa panimalay ang kapitan usa pa mibuto ang pistola sa mga suspetsado apan daling nakasibat human sa insidente. Nakuha sa crime scene ang basyo sa kalibre 45.

Sa pagkakaron, padayon ang pag ila sa kapolisan sa mga suspetsado hilabina na nga giingong padayon nga nakadawat og pagpanghulga sa kinabuhi ang kapitan.

Daghan sab nga anggulo ang gitutokan sa kapolisan apan dili pa kini nila mapahibalo.