BUOT imbestigahan karon sa Police Regional Office 10 (PRO-10) kung kinsa ang nagpaluyo pagpagawas sa listahan sa mga personalidad sa Cagayan de Oro nga giingong membro ug misuporta sa Communist Party of the Philippines of New People’s Army.

Sa maong papel nga gipagawas adunay 19 ka mga personalidad ang ginganlang ug upat ka mga organisasyon nga naggikan sa siyudad sa Cagayan de Oro nga giingong kunsabo sa partido komunista ng Pilipinas.

Si Police Superintendent Surki Sereñas, tigpamaba sa Police Regional Office- Northern Mindanao, niingon nga nakakuha na siya og kopya niini.

“Nakakuha kita og kopya pero dili kita mohimo ug claims o maghatag og charges sa tao nga wala tay ebidensya. Lisod kaayo maghatag tag statement nga walay kapasikaran,” pahayag ni Sereñas.

Matud ni Sereñas nga iya kining gikasubo tungod kay kini pagguba sa relasyon sa kasundalohan ug kapulisan ngadto sa komunidad.

“Propaganda kana nga gusto magdala og disunity sa ato dinhi sa Cagayan de Oro,” matud ni Serenas ug nasubo kay ang anaa sa listahan nga mga personalidad nga iyang kaila ug higala hinungdan nga ila kining gitimbang-timbang og maayo.

“Pagkakuha nato sa kopya, gipa analyse nato ug sa tuno palang inistoryahan may pagka aktibista,” matud ni Sereñas ug nagtoo nga dili kini nagikan sa kasundalohan labaw na sa kapolisan.

“Do you believe dili ingon ana atong klase sa mga material. Dili ingon ana ang tuno sa pag-estorya ug pagsulat. Naa gyod sa grupo nga gusto gubuton atong relasyon sa community ug gobyerno. We believe naa nay shortlist kung asa ni pwede nagsumikad, atoa nalang is damage control aron dili na masakyan. Atong assessment gusto nila naa tay kagubot aron dali ta magipit,” matud niini ug adunay mga pagduda nga gikan sa komunista.

“Kaila ta ani nila (listahan) ug naay personal nga relasyon ug wala tay makuha kung ato ning I red tag sila,” matud ni Sereñas ug miklaro nga ang maong listahan wala nagsumikad kanila.

Pipila sa pangalan nga anaa sa listahan ang dili makadawat niining pag red tag kanila tungod kay nanginabuhi sila og tarong.