BAG-O na ang director sa Police Regional Office (PRO)-Northern Mindanao nga nagsugod niadtong adlawng Huwebes, Oktubre 31, kon asa gihatagan kini og pormal nga turnover of command.

Gi-relieved na sa iyang pwesto si PRO-Northern Mindanao Director Police Brigadier General Rafael Santiago ug gi-reassigned kini sa buhatan sa Philippine National Police (PNP) chief.

Naglingkod si Santiago niadtong bulan pa sa Mayo sa wala pa ang election.

Hulip niya mao si Police Brigadier General Rolando B. Anduyan gikan sa National Capital Region Police Office (NCRPO).

Si Anduyan nipasalig sa iyang bag-ong liderato nga padayunon ang mga nasugdan ni Santiago ug dugangan kung unsa man kakulangon niini.

Unang gisulti ni Police Lieutenant Colonel Mardy Hortillosa nga dili maapektuhan sa pagbiya ni Santiago tungod kay nakaplano na tanan programa alang sa kapolisan, labina ang paghatag ug kahapsay ug kalinaw sa rehiyon.

Tak-om sab ang baba niini sa giingong kasong giatubang karon ni Santiago.

Una na nga gipahibalo ni Acting PNP Chief Police Lieutenant General Archie Francisco Gamboa niadtong Martes nga gi relieved si Santiago gumikan sa issue sa logistics.

Gipasakaan kini og kaso niadtong tuig 2012.

"He was relieved because he has a suspension order that came out that was dated October 21, 2019. It's about logistics. Parang hindi na-turn-over ang firearms so he was suspended for six months," matud niini sa mga media sa kaulohan.