USA ka pulis ang naglasong human gibalibaran sa masahista dihang naghangyo og “extra service” sulod sa spa niadtong Marso 19 mga alas 10:50 sa gabii, sa J.R Borja Street, dakbayan sa Cagayan de Oro.

Nag-atubang og duha ka mga kaso ang usa ka Police Officer 1 (PO1) kinsa kasamtangang nadestino isip intelligence operatives sa Regional Mobile Force Battalion (RMFB) – Northern Mindanao sa Gusa human nga nanghadlok sa dihang gibalibaran sa iyang gusto.

Sa pakighinabi kang Polcie Inspector Ernesto Sanchez, deputy station commander sa Police Station 2 (PS2) sa Cogon, gibutyag niini nga subay pa sa biktima nga masahista nga nihangyo og “extra service” ang pulis samtang kini nagpamasahe.

Ang extra service nagpasabot og mas labaw pa sa masahe nga serbisyo.

“Allegedly sa complainant, nanghangyo daw ni og extra service nahitabo nga ang biktima dili gusto kay sumala pa sa tag-iya nga kini nga spa wholesome spa ni wala ni mga extra services, wala mahatag sa iyaha iyang gusto, nagsisigaw siya,” matud ni Sanchez.

Giingong ang maong PO1 ang mag-atubang sa kasong grave coercion ug Commission on Elections (Comelec) gun ban.

“Naa tay kauban sa serbisyo nga nahitabo gyud ang dili dapat mahitabo nga naka violate siya og sumala pa sa among gi -file nga kaso nga grave coercion ug Comelec gun ban violation,” dugang niini.

Ang maong kaso ang napasaka na batok sa suspek kinsa kasamtangang anaa sa kustodiya sa kapulisan sa PS2.