NAKABSAN sa kinabuhi ang usa ka pulis human naunay sa iyang pistola niadtong Pebrero 23 mga alas 1:02 sa kaadlawon sa Purok 4B, Barangay Aglayan, Malaybalay City, Bukidnon.

Giila ang biktima nga mao si Police Senior Master Sergeant Norman Nogalo, kinsa nadestino sa Malaybalay City Police Station.

Sa inisyal nga imbestigasyon sa Malaybalay City Police Station, nasuta nga kining biktima nangihi niadtong tungora dihang ang pistola niini nga anaa sa iyang hawak giingong aksidenteng nakasa, hinungdan nga mibuto ug maayong pagkaigo sa iyang walang bahin sa paa.

Gisuwayan kini og dala sa Bukidnon Provincial Medical Hospital (BPMH) apan gideklarar nga dead on arrival sa mga doktor.

Ang tigpamaba sa Bukidnon Provincial Police Office nga si Police Lieutenant Colonel Silvestre Asiong Jr. nipasabot sa Superbalita Cagayan de Oro nga sa pagkakaron, padayon ang ilang imbestigasyon sa hitabo.

Gisulti niini nga gikan kining biktima sa iyang duty nga pangabii ug pauli na niadtong tungora.

Gidugang niini nga ilang giimbestigahan ang report nga giingong nihapit kini sa sabungan ug lango sa ilimnong makahubog dihang nahitabo ang insidente.

"As of now, giimbestigar pa kana nato nga parte labina gidili man kanato ang moanha sa mga sabungan," pagpasabot ni Asiong ug niingon nga ang nabiyaang pamilya ni Nogalo ang hatagan og assistance gikan sa kapulisan.

Nasayran nga 17 ka tuig na si Nogalo nga sakop sa Malaybalay police ug gani, giila kini nga consistent sa iyang mga report labina anaa kini sa Operation office nadestino.

"Kini siya nga pulis maoy pinakaulahi mouli pinaka una sab moabot pagkabuntag," matud ni Asiong.