DUHA ka mga alagad sa gobyerno ang nasikop sa kapolisan sa managlahing drug bust sa Northern Mindanao.

Usa ka Sangguniang Kabataan chairman uban iyang inahan unang nadakpan sa drug bust sa lungsod sa Opol, Misamis Oriental.

Sikop si Stephen Kyle Sabasaje, SK chairman sa Sambulawan, El Salvador City, Misamis Oriental, nga giilang high-value target sa pagpayuhot sa ginadili nga druga.

Lakip sa naaresto iyang amahan nga si Leonil Mabute Pepito, 45, ug Evelyn Sabasaje Pepito, 38, residente sa Sambulawan, El Salvador City.

Narekober sa ilang posisyon ang tulo ka pakete sa gitouhang shabu ug taxi nga giingong gamit sa transaksyon.

Gibutyag ni Police Major Evary Bacunawa, hepe sa Opol Police station nga wala sila nasayod nga tsirman ang ilang target ug uwahi na nila nahibaloan diha na sa pagdakop kay numero lang ilang unang nadawat.

Arestado sab sa drug bust sa Valencia City Police Station ang usa ka polis nga giilang si Michael John Undap, 33, nadestino sa Manolo Fortich Police Station ug usa ka sibilyan nga giilang si Glenn Vincent Valendez, pulos mga residente sa Maramag, Bukidnon.

Nakuha sa ilang posisyon ang gibana-banang 1.5 gramo sa gituohang shabu nga mobalor P15,000; 9mm pistol ug usa ka motorsiklo.

Si Police Lt. Colonel Surki Sereñas, hepe sa Valencia City Police Station nibutyag nga ang gihimo niini nakadaot man og dungog sa kwerpo sa kapolisan apan tungod kay lahi nga dalan ang gisubay niini angayan niining atubangon ang unsa man nga silot sa balaod ug administratibo.