HUGOT ang baruganan sa bag-ong konsehal sa siyudad sa Cagayan de Oro nga dili siya mamahimong sakop sa majority bloc sa Konseho ug mobalhin og laing partido.

Apan gipasabot ni Konsehal Jocelyn "Bebot" Rodriguez atol sa unang adlaw sa paglingkod isip konsehal sa siyudad nga dili usab siya mamahimong babag diha sa kaayohan sa siyudad og katawhan.

"Ako i-recruit? Na mao raba gyud na akong batasan kay wala gyud makadiktar sa ako if ever dili siguro mahitabo because I have my own party, ang Centrist Democratic Party, I am the chairman in Cagayan de Oro City, lisod," matud ni Rodriguez.

Apan giingong andam kini nga mosuporta sa mga programa sa mayor ug sa konseho sa siyudad ilabi na kung alang lamang sa kaayohan sa katawhan ug sa tanan.

Nanghinaot usab kini nga mamahimong hapsay ang pagpangatungdanan sa dakbayan.