HUGOT nga seguridad ang gipatuman karon sa dakbayan sa Cagayan de Oro ilabi na nga nagsugod na ang usa ka bulan nga kalihokan sa nagkaduol nga Higalaay Festival 2019 subay sa kapistahan ni St. Augustine ning dakbayan sa Cagayan de Oro.

Gibutyag ni PLt. Col Henry Dampal, City Director sa Cagayan de Oro Police Office (Cocpo) nga malinawon ang dakbayan apan dili malikayan nga dunay mga posibilidad sa hulga sa pagsabotahe sa kahusay ug kalinaw ilabi na nga daghan ang lumalabay ug dumuduong.

Naghangyo kini nga magtinabangay ang komunidad aron mga malampuson ug mahimong malinawon ang kasaulogan.

"Daghan gyud kaayo galabay sa ato with that situation dili gyud nato ma discount nga dunay threat, ang kapulisan uban sa kasundalohan and other law enforcement agencies naningkamot gyud nga maka provide ta og maximum security sa atong mga kaigsoonan," matud ni Dampal.

Naghangyo usab si Mayor Oscar Moreno sa katawhan ilabi na sa nasinatiang mga pagkabalda sa trapiko tungod sa gipatumang hugot nga seguridad alang sa nagsing-abot nga kapistahan diin estrikto na ang mga checkpoints.

"Mas istrikto na atong mga checkpoints in fact causing some delays sa traffic sa both ends sa west and east and other areas, I hope people will understand gamay lang nga inconvenience para sa atong security measures," matud ni Moreno.

Samtang nanghinaot usab si Dampal nga maplastar na tanan ug di na maapektahan ang dagan sa trapiko apan nagpadayon ang ilang ipahigayong checkpoints.