MIHATAG og katin-awan ang simbahang Katoliko ilabi na ang pamunoan sa Archdiocese sa Cagayan de Oro nga suportado ang pakigbatok sa administrasiyon ni Presidente Rodrigo Duterte kalabot na sa ilegal nga druga.

Matud ni Archbishop Antonio Ledesma, archbishop sa Archdiocese sa dakbayan sa Cagayan de Oro, nga naghimo sila og mga kalihokan ilabi na sa rehabilitasiyon sa mga nalambigit sa ilegal nga druga.

“First of all we make it clear that the church is also working for drug rehabilitation and also support yung campaign against illegal drugs,” matud ni Ledesma.

Apan giingong supak kini sa mga pagpanglapas sa tawhanong katungod gumikan kay girespeto niini ang dignidad sa matag usa ug kinahanglan nga dunay insaktong proseso ilabi na diha sa pagsilot sa mga nakalapas sa bala-od.

“But we are against violation of human rights and we want to make sure that there is due process for everyone because you have to respect the human dignity of everyone,” dugang niini.

Nasayran nga grabe ang pagpangatake ni Duterte sa simbahang Katoliko ilabi na sa mga kaparian ug mga obispo diin nag-unang kritiko sa maong pakigbatok sa ilegal nga druga gumikan matud kay human kini gilusad ubay-ubay na ang mga nangamatay.