LIBOAN ka mga supporters ang midagsa sa buhatan sa City Commission on Elections (Comelec) Miyerkules, Oktubre 17, atol sa pagduso sa kandidatora sa Team Okka.

Una nga nagpahigayon og misa sa San Agustine Cathedral dayon nagbaklay ang tibuok pwersa uban sa mga supporters ni Mayor Oscar Moreno, Vice Mayor Kikang Uy uban sa mga kasamtangang konsehales nga sila si Reuben Daba, George Goking, Teudolfo Lao, Eric Salcedo, Ma. Lourdes Gaane, Suzette Daba, Zaldy Ocon, Jay Pascual, Edna Dahino ug dugang mga bag-ong konsehales nga sila si Roger Abaday, Gerlie Balaba, Jun Daba, ug Andrew Melliza.

Uban usab ang kongresista nga sila si Alam Lim sa 2nd District ug Klarex Uy sa 1st District.

Matud ni Police Chief Inspector Julius Clark Prisco Macariola, hepe sa Police Station 1 (PS1) sa Divisoria, nga anaa sa mga 5,000 kapin kon kulang ang katawhan nga nagkatigom.

“Nakita nato nga gikan sa District 2 nagbaklay gikan sa Abellanosa Barangay 17 estimate namo mga naa sa 2,500 gikan diri sa District 1 sa Carmen ang ni-abot pud sa Cathedral mga 1,000 actually estimate nga crowd ni-abot gyud siya og 4,500 to 5,000 nga tao,” pahayag ni Macariola.

Nagpabilin usab ang mga supporters hangtod nga nakahuman sa pagduso ang mga kandidato sa ilang mga tagsatagsa ka mga certificate of candidacy (COC).

Nasayran nga human sa pagduso sa tanang membro adunay gipahigayong press conference.