GIKLARO ni Provincial Risk Reduction Management Department head (PDRRMD) Fernando Vincent Dy nga kadtong dagko nga balod nga mihapak sa parke nga bahin sa lungsod sa Balingasag, Misamis Oriental dili storm surge.

Kini human daghan ang nabalaka dihang nagtrending ang mga hulagway niini nga gipost Superbalita Cagayan de Oro Facebook page.

Matud ni Dy sa SunStar Superbalita nga normal lang kadto nga balod nga nasinatian labina sab niadtong tungora adunay bahin sa nasud nga gihapak sa bagyong Falcon.

Dugang niini nga ang paghapak sa dagkong balod sa boulevard nga bahin sa Balingasag ang miabot sab ngadto sa usa ka oras.

Nasayran sab gikan niini nga dili lang lungsod sa Balingasag ang nakasinati niini apan lakip baybayon nga bahin sa lungsod sa Jasaan kon asa adunay payag nga gilampornas sab sa balod.

Gipasalamatan lamang niini nga ang katawhan sa lalawigan gamatngon na sa mga ingon ani tungod kay pipila sa residente daplin sa baybayon ang nanghikling gyod dayon.