NAPULO ka mga dagkong kompanya sa Misamis Oriental ang gipasidunggan sa kagamhanan sa probinsya sa pagpangulo ni Misamis Oriental Governor Bambi Emano.

Kini tungod kay abtik mobayad sa buhis kining mga mosunod nga kompanya.

Nag-una sa listahan ang FDC Misamis Power Corporation nga adunay P59.1 milyon nga gibayaran sa third quarter sa 2019. Gisundan sa Minergy Power Corporation nga nagbayad og buhis nga P40.2 milyon; Holcim Philippines Corporation, P24 milyon; Moresco 1, P12.7 milyon; Coca Cola Femsa Philippines, P9.6 milyon; Steag State Power Inc., P6.9 milyon; Fast Services Corporation, P5.1 milyon; Indorama Ventures Packaging Philippines, P3.07 milyon; Axelum Resources Inc., P2.8 milyon; ug Nutrimax Fresh Baked Inc., gabayad og P2.6 milyon.

"We are doing very well with our collection in taxes. The more taxes that we are able to collect the more programs, the more projects that we will be able to deliver to our people," kini ang reaksyon ni Emano.

Gipasalamatan sab niini ang provincial treasurer nga si Ronald Violon sa kaikag sa pagpangolekta og buhis niining mga dagkong kompanya.

"Pasalamat dili lang sa iya but sa team of course because of the leadership of Ronald Violon. Congratulations Ronald for a job very well done. Keep it up. I hope that we will improve collection more and efficiently," dugang ni Emano.

Si FDC Misamis Power Inc. president ug CEO Juan Eugenio Roxas niingon nga ilang responsibilidad ug ihatag lang ang angayan para sa gobyerno.

"Kining pagrecognize sa amoa makapadasig sa amoa to continue to pay not only the correct taxes but also to pay our taxes on time. So kami magpadayon sa among commitment sa pagbayad sa insaktong buhis," pahayag niini.